Dutki bargan ja buvttadeapmi
Oktasašgárgeheami proseassat
Árrabajásgeassin
- roahkasmahttit mánáid oktasaš dutkamii ja geahččaladdamii teknologiija olis. Oahpahallat muitalit iežas jurdagiid birra ja hárjehallat doaibmat iešguđetlágan rollain.
Ovdaoahpahus
- bagadallat mánáid čoavdit čuolmmaid ja hárjehusaid suokkardallamiin ja geahččaladdamiin ovttas. Hárjehallat ovdanbuktit iežas jurdagiid earáide ja juohkit bargguid oktasaš prošeavtta ollašuhttima várás.
Jahkeluohkkáollisvuohta 1–2
- máhttá ovdanbuktit iežas ideaid, guldalit earáid ja geahččalit čovdosiid ovttas ja lonohallat vuoruid iešguđet rollain programmeremii laktáseaddji joavkobargamis.
Jahkeluohkkáollisvuohta 3–6
- máhttá govvidit iešguđet vugiiguin iežas jurddašanvugiid, vuhtiiváldit earáid geahččanguovlluid ja bargat áŋgirit juksan dihtii oktasaš mihttomeari programmerenprošeavttas.
Jahkeluohkkáollisvuohta 7–9
- ádde iešguđetlágan joavkorollaid ja ovttasbarggu vugiid ja bargá veahkkálagaid ja aktiivvalaččat oassálastimiin programmerenprošeavttain.
- máhttá juohkit iežas programmerejuvvon buktosiid earáid geavahussii ja máhttá ávkkástallat earáid buktosiiguin vásttolaččat.
Hutkás buvttadeapmi
Árrabajásgeassin
- viiddidit mánáid teknologiijai laktáseaddji vásáhusmáilmmi dutkamiin árgabeaivvi mašiinnaid ja rusttegiid doaibmaprinsihpaid. Hutkat ja huksedit iežas rusttegiid ja hutkás teknologalaš čovdosiid, mat ovdanbuktojit earáide.
- speallat iešguđetlágan spealuid ja dutkat ovttas daid iešvuođaid. Rievdadit mánáiguin oahpes stohkosiid ja gárvves spealuid hutkamiin daidda ođđa njuolggadusaid, bargobihtáid dahje ovdánanvugiid.
Ovdaoahpahus
- oahpásmuvvat robotihkain ávkkástalli rusttegiidda ohcamiin dieđuid iešguđetlágan gálduin. Plánet ja hukset iešguđet ávdnasiin iežas rusttegiid ja robohtaid ja govvidit earáide daid ulbmila ja doaibmaprinsihpaid.
- plánet ja ollašuhttit mánáiguin doaimmalaš ja máinnaslaš birrasiid gos geavahuvvojit spealuid elemeanttat, dego njuolggadusat, čuoggáid lohkan dahje áigeráddjehusat. Hutkkadit iežas speallanfiguvrraid.
Jahkeluohkkáollisvuohta 1–2
- máhttá dahkat iešguđetlágan áššiin modelleremiid rávvaga mielde ja hutkájit ollašuhttimiin iežas jurdagiid. Oahppi ovdanbuktá ja juohká ideaidis earáiguin.
- máhttá meannudit bagadallama vuollásažžan dahje ovttasbarggus earáiguin máinnaslašvuođa dahje spealuid elemeanttaid sisttisdoalli digitála buktosa geavahemiin animašuvnna vugiid dahje oktageardánis programmerema.
Jahkeluohkkáollisvuohta 3–6
- máhttá ávkkástallat buktosiiddisguin iežas áicamiiguin, mihtidemiiguin dahje dovddaniiguin (su. anturi) ja ovttastahttit daidda robotihka. Oahppi ovddošdikšu eksisterejeaddji čovdosiid hárjehallamiin iteratiivvalaš bargama dahjege jeavddalaš hutkkadeami, bargama, testema ja joatkkagárgeheami.
- máhttá dovdát animašuvnnaid ja spealuid programmeremii laktáseaddji iešvuođaid.
Jahkeluohkkáollisvuohta 7–9
- máhttá plánet ja ollašuhttit ovttasbarggus earáiguin čovdosa, mas geavahuvvojit muhtin sensoriiguin ávkkástalli čovdosa ja robotihka dahje automašuvnna.
- máhttá hábmet ja ollašuhttit spealu, stimulašuvnna dahje áppa, mii čoavdá man nu skuvlii dahje oahppi iežas eallimii laktáseaddji čuolmma.
Programmeren oahppama reaidun
Árrabajásgeassin
- programmeremis dárbbašuvvon jurddašeami ja ovttasbarggu máhtut hárjehallojit lávdamáhtolaččat buot doaimmain ja oahppama iešguđet surggiin: imaštallat, oahpásmuvvat, geahččaladdat ja oažžut vásáhusaid teknologiijas ja teknologiija olis.
Ovdaoahpahus
- mánát ožžot vásáhusaid hutkás dahkamis ja ovdanbuktimis teknologiija bokte ja dahket stohkosiid sisttisdoalli hárjehusaid ávkkástallamiin iešguđetlágan ávdnasiiguin ja doaibmarávvagiiguin ja rusttegiiguin ja reaidduiguin, mat stivrejuvvojit gohččumiiguin.
Jahkeluohkkáollisvuohta 1–2
- máhttá gieđahallat sisdoaluid, mat hárjehallojit iešguđet oahppoávdnasiin, stoaguslaččat ja geahččaladdamiin programmeremii laktáseaddji doaibmavugiid ja reaidduid.
Jahkeluohkkáollisvuohta 3–6
- máhttá geavahit programmeremii laktáseaddji bargovugiid ja -reaidduid hutkás ovdanbuktimii ja iežas buvttadeapmái ja iešguđetlágan fenomenaid ja fáttáid dutkamii ja čilgemii iešguđet oahppoávdnasiin ja daid ovttastahtti ollisvuođain.
Jahkeluohkkáollisvuohta 7–9
- dovdá iešguđet oahppoávdnasiidda laktáseaddji teknologiijalaš áppaid ja máhttá čilget daid doaibmaprinsihpaid. Oahppi máhttá ávkkástallat programmeremii laktáseaddji bargovugiiguin buot oahppoávdnasiin.
Praktihka máhtut
Árrabajásgeassin
- mánát áiccadit addit doaibmarávvagiid iešguđetlágan diliin.
Ovdaoahpahus
- mánáiguin geahččaladdat doaibmagohččumiid addin vejolašvuođaid mielde muhtin rusttegiin dahje áppain, mii programmerejuvvo.
Jahkeluohkkáollisvuohta 1–2
- máhttá stivret man nu programmerema vuollásaš rusttega dahje ovttaskas figuvrra man nu áppas dahje fierbmebargobihtás.
Jahkeluohkkáollisvuohta 3–6
- máhttá geavahit gráfalaš programmerenbirrasa ja máhttá ráhkadit dainna iežas prográmma, animašuvnna dahje spealu.
Jahkeluohkkáollisvuohta 7–9
- máhttá programmeret prográmmaid iešguđet birrasiin ja dovdá vuođđoáššiid ovtta teakstavuđot programmerengielas.