Programmerema vuođul jurddašeapmi
Logihkalaš jurddašeapmi ja dieđu gieđahallan
Árrabajásgeassin
- oahppanbirrasat plánejuvvojit nu, ahte mánát sáhttet stoagadettiineaset hárjehallat programmeremis dárbbašuvvon jurddašeami máhtuid: kategoriserema, veardádallama ja ortnegii bidjama. Mánáiguin áiccadit maiddái jeavddalašvuođaid ja áššiid, mat geardduhuvvojit.
Ovdaoahpahus
- mánáiguin geahččaladdat ja buvttadit stoaguslaččat doaimmaid, mat geardduhuvvojit jeavddalaččat dego ritmmat. Dasa lassin suokkardallat mii áššiid dagahii man nu ášši. Dahkkon válljejumit čilgejuvvojit sánálaččat ja ovttas.
- mánát bagadallojit kategoriseret, veardádallat ja ordnet áššiid dihto ákkaid vuođul, dego hápmi, sturrodat dahje ivdni.
Jahkeluohkkáollisvuohta 1–2
- máhttá ordnet ja veardádallat áššiid iešguđet lágan eavttuid, dego hámi sullalasvuođa, vuođul. Oahppi dovdá logihkalaš operašuvnnaid, dego “ja”, “dahje”, “ii”.
- máhttá muitalit válljejumiidis ja áicamiiddis birra sánálaččat doahpagiid ja konkrehtalaš reaidduid bokte.
Jahkeluohkkáollisvuohta 3–6
- máhttá ordnet, veardádallat ja ovdanbuktit informašuvnna geavahemiin teknologiijai laktáseaddji doahpagiid ja symbolaid.
- máhttá hábmet oktavuođaid iešguđet ollisvuođaid gaskkas. Dasa lassin oahppi máhttá gávdnat ja govvidit áššiid gaskavuođaid, mii dagahii mange ášši.
Jahkeluohkkáollisvuohta 7–9
- máhttá gieđahallat iešguđetlágan informašuvnna hámiid, geavaha dan gieđahallamis iešguđetlágan merkenvugiid ja ollašuhttá informašuvnnain logihkalaš operašuvnnaid.
- ávkkástallá algoritmmalaš jurddašemiin iešguđet oahppoávdnasiidda ja prošeavttaide laktáseaddji dutkamis ja dieđu buvttadeamis ja ovdanbuktimis.
Čuolmmaid čoavdin ja modelleren
Árrabajásgeassin
- mánát roahkasmahttojit imaštallat ja ovdanbuktit gažaldagaid birrasa albmanusain ja áššiin ja maiddái ohcat daidda ieža vástádusaid ja čovdosiid. Nammadit ja čilget albmanusaid ovttas.
Ovdaoahpahus
- mánát arvvosmahttojit dutkat ja lađastallat árgabeaivvi albmanusaid ja suokkardallat daidda laktáseaddji gažaldagaid. Mánáiguin hárjehallat govvidit ja čilget áicamiid ja suokkardallat iežaset čovdosiid.
Jahkeluohkkáollisvuohta 1–2
- máhttá burgit árgabeaivvi oahpes albmanussii laktáseaddji čuolmma osiide ja ohcat ja geahččaladdat dan čovdosii laktáseaddji iešguđetlágan molssaeavttuid. Oahppi máhttá muitalit čoavddusvugiidis birra.
Jahkeluohkkáollisvuohta 3–6
- máhttá geavahit čuolmma čoavdimii iešguđetlágan vugiid ja čoavddusminstariid ja geahččaladdá hábmet daid maid ieš.
- máhttá vihkkedallat čovdosiid ávkkástallamiin man nu gáibádusain, dego doaibmágo, leago logahahtti dahje beaktil.
Jahkeluohkkáollisvuohta 7–9
- máhttá analyseret čuolmmaid ja árvvoštallat daid vejolaš čovdosiid iešguđetlágan gáibádusaid vuođul ja lassin visualisere čuolmmaid ja čovdosiid generaliserejumiid ja lávadagaid bokte.
- ávkkástallá algoritmmalaš jurddašemiin iešguđet oahppoávdnasiidda ja prošeavttaide laktáseaddji čuolbmačoavdimis.
Programmeremii laktáseaddji doaibma, doahpagat ja vuođđoráhkadusat
Árrabajásgeassin
- oahpahallat stoahkamiin ja doaimmalaš bargobihtáid bokte doaibmat rávvagiid mielde. Rávvagat sáhttet leat gorutlaččat, visuálat, sánálaččat dahje vuođđuduvvat jienaide.
Ovdaoahpahus
- oahpásmuvvat algoritmma doahpagii dutkamiin iešguđetlágan doaibmarávvagiid ja vugiid addit rávvagiid. Geahččaladdat stohkosiid bokte addit ja čuovvut doaibmarávvagiid.
Jahkeluohkkáollisvuohta 1–2
- máhttá ráhkadit muttuid mielde doaibmarávvagiid geavahemiin oktageardánis gohččumiid ja geardduhanráhkadusa. Oahppi dovdá rávvagiid buvttadan meattáhusdiliid ja geahččala čovdosiid divvut daid.
Jahkeluohkkáollisvuohta 3–6
- máhttá ráhkadit aiddolaš ja dárkilis doaibmarávvagiid geavahemiin geardduhan- ja válljenráhkadusaid. Oahppi ohcá ja divvu meattáhusaid doaibmarávvagiin ja prográmmakodas.
Jahkeluohkkáollisvuohta 7–9
- diehtá, mot iešguđetlágan programmerenráhkadusat, dego maŋŋálas, ođđasit dáhpáhuvvi ja eavttuvuloš doaimmat ja molsašuddit, doibmet. Oahppi máhttá hábmet prográmma daid geavahemiin.
- máhttá dulkot teakstavuđot programmerengiela ja dovdá iešguđetlágan ráhkadusaid dainna dahkkon prográmmakodas.