Ohjelmointiosaaminen

Ohjelmistemmättim arâšoddâdmist 

Párnááh uápásmuveh pargeiguin teknologisii pirrâsân já hárjutteleh ohjelmistmist tarbâšum valmâšvuođâid já vuáđutááiđuid. Sij aicâdeh já nomâtteh aargâ teknologia já piergâsijd já suogârdeleh toi ulme já toimâm. Pargeeh movtijditteh párnáid imâštâllâđ aašijd já ruokâsmitteh koijâdiđ já uuccâđ vástádâsâid koččâmuššáid. Párnááh hárjutteleh loogisii jurdâččem tááiđuid, tego šlajâttâllâm já viärdádâllâm. Sij máttáátteleh muštâliđ aašijn já jieijâs jurduin sehe toimâđ oovtâst já adelum ravvui miäldásávt.

Arâšoddâdmist párnááh finnejeh vuáttámušâid teknologiast já hárjutteleh ohjelmistmân lohtâseijee tááiđuid sierâdmáin, spellâmáin já oovtâst keččâlâdmáin sehe jieijâs pyevittâsâid ideistmáin já huksiistâlmáin.

Ohjelmistemmättim ovdâmáttááttâsâst

Máttáátteijee uápásmuvá párnáiguin tiätumašinân já sij aicâdeh oovtâst tiätumašinij stivrim teknologia aargâ pirrâsijn. Sij totkeh oovtâst piergâsij toimâmprinsiipijd. Párnááh hárjutteleh orniđ aašijd jieškote-uv vuovijguin já vuáđustâlmijguin sehe čielgejeh aiccâmušâid já čuávdusijd oovtâst. Párnááh oovtâst máttáátteijein suogârdeleh, jesânisteh já totkeh aargâ almonijd já čuolmâid. Párnááh uápásmuveh jieškote-uvlágán toimâmravvuid já keččâledeh sierâdâlmáin toimâmravvui nuávdittem já adelem.

Ovdâmáttááttâsâst párnááh finnejeh hárjáneme kreativlii pargeeldmist já olgospyehtimist teknologia iššijn. Sij keksejeh já rahtâččeh jieijâs piergâsijd, robottijd já speelâhámásijd pirrâsijd sehe kovvejeh toi toimâmprinsiipijd. Máttáátteijee movtijdit párnáid oovdânpyehtiđ jieijâs ideaid já kuldâliđ iärásijd já jyehiđ pargoid ko pargeh oovtâst iärásijguin.

Ohjelmistemmättim iheluokkain 1-2

Uáppeeh oovtâst máttáátteijein aicâdeh uáppei vuáttámušmaailmist tiättojeijee tiätutekniik já uápásmuveh robotikân. Sij máttáátteleh kuvviđ tiätuteknisij piergâsij toimâmprinsiipijd. Sij hárjutteleh tubdâđ kiärdášuvvee kaavaid já njuolgâdusmiäldásâšvuođâid sehe orniđ tiäđu iävtui vuáđuld. Sij muštâleh jieijâs aiccâmušâin já valjiimijn tuáváduvâi já piergâsij iššijn. Uáppeeh oovtâst máttáátteijein raččoh argâpiäiválijd čuolmâid ossijd já keččâleh tooid čuávdusmuulsâiävtuid. Sij rähtih sierâdâlmáin toimâmravvuid, maid puáhtá testađ meid ohjelmistemnáál piergâsáin, sehe hárjutteleh tubdâđ feilâtiilijd.

Iheluokkain 1-2 uáppeeh kevttih ohjelmistmân lohtâseijee toimâmvuovijd já piergâsijd kreativlávt, sierâdâlmáin já keččâlâdmáin, ko kieđâvušeh jieškote-uv oppâamnâsij siskáldâsâid. Uáppeeh hárjutteleh pargoroolâin vuáruttâllâm já oovdânpyehtih já jyehih jieijâs ideaid iärásijguin. Uáppeeh oovtâst máttáátteijein olášutteh mainâshámásijd pyevtittâsâid kevttimáin animistem tâi ohjelmistem.

Ohjelmistemmättim iheluokkain 3-6

Uáppeeh aicâdeh ohjelmistem já robotik ohtsâškoddeest já suogârdeleh teknologisij heiviittâsâi ávhástâllâmvuovijd já merhâšume uáppei elimist. Uáppeeh oovtâst máttáátteijein savâsteleh tiätu juávkun čuosâttum digitallijn siskáldâsâin sehe uáppei jieijâs toimâmist digitallijn pirrâsijn.

Uáppeeh kevttih čuolmâ čuávdimân jieškote-uvlágán čuávdimkaavaid, maid sij keččâleh rähtiđ meid jiejah. Sij árvušteleh čuávdusijd kevttimáin monnii kriiteer. Sij kieđâvušeh já oovdânpyehtih tiäđu tuáváduvâi já symbolij vievâst. Sij rähtih toimâmravvuid já algoritmijd kevttimáin iššeen ohjelmistem vuáđuráhtusijd sehe oceh já tivodeh feeilâid toimâmravvuin. Sij ohjelmisteh graafisii ohjelmistempirrâsist.

Iheluokkain 3-6 uáppeeh hárjutteleh siđhes já iterativlii pargeldem ohtsii ulme olleem várás. Sij kevttih iššeen kreativlii olgospyehtimist já jieijâs pyevtittâsâin mittomijd já anturijd, automaatio já robotik sehe jieškote-uvlágán animistem- já ohjelmistemvuáđuid.

Ohjelmistemmättim iheluokkain 7-9

Uáppeeh uápásmuveh algoritmij, automaatio já robotik heiviittâssáid eellim jieškote-uv suorgijn. Sij savâsteleh oovtâst máttáátteijein ohjelmistum teknologia máhđulâšvuođâin, riiskâin já eettisijn uáinuin. Máttááttâsâst kieđâvuššojeh tiätu juávkun čuosâttum siskáldâsah já personistum palvâlusah. Uáppeeh oovtâst máttáátteijein suogârdeleh digitallijn pirrâsijn nurrum tiäđu já ohjelmistem sosiallii já ohtsâškodálii merhâšume.

Uáppeeh analysisteh já visualisteh čuolmâid já toi čuávdusijd sehe árvušteleh taid kriterij iššijn. Sij kevttih tiäđu kieđâvušmist já oovdânpyehtimist maaŋgâlágán almolistmijd, diagramijd já merkkimvuovijd sehe loogisijd operaatioid. Uáppeeh tulkkojeh ohjelmkoodijd sehe rähtih jiejah ohjelmijd, moh ulmemiäldásávt kevttih iššeen ohjelmistem vuáđuráhtusijd. Uáppeeh vuávájeh já ohjelmisteh ohjelmijd maaŋgâlágán pirrâsijn.

Iheluokkain 7-9 máttááttâsâst kiävttoo iššeen algoritmisâš jurdâččem já ohjelmistem jieškote-uv oppâamnâsijn já maaŋgâsuárgág oppâmubâlâšvuođâin. Uáppeeh oovtâst máttáátteijein vuávájeh já olášutteh kreativlijn ohtsâšovdedemprojektijn ohjelmistum pyevtittâsâid, moh čuávdih oppâamnâsáid tâi rievtis elimân lohtâseijee čuolmâid.