Media tuʹlǩǩõs da arvvlâsttmõš
Mediasiiʹsǩi tuʹlǩǩõs
Ouddpeâmm
- tobdstâʹtte mediaaʹje da jeeʹresnallšem kaartid, liikkeei kaart da jiõn de täi õhtteeʹlmid siiʹsǩeeʹjid mediasiiʹsǩid: täʹrǩstâʹlle liisti da ǩiiʹrji kaartid, ǩeäʹčče videoid, speâlla digitaalʼlaid siõrid da kuvddle jiõnnǩiiʹrjid.
- mättʼtâʹtte fiʹttjed, što pieʹǩǩ media čuäʹjtem aaʹššin lij tuõtt da pieʹǩǩ liâ miõlljuurdla da što mediasiiʹsǩe liâ oummi raajjâm. Häʹmmee räätk ouddmiârkkân vääʹldeeʹl da miâlleeʹl snimldõõǥǥid jiõčč.
- jeällâʹtte mediasiiʹsǩid da smeʹllkâʹstte päärnaid mainsted sij vueiʹnnem da kuullâm mediasiiʹsǩi čõunnâm tååbdin määŋgpeällsain õlmmeemkuånstid ââʹneen.
Vuõssmättʼtõs
- ǩiččlâʹdde määŋgpeällsânji jeeʹresnallšem mediasiiʹsǩid, mâʹt-a päärnaid suåppi ođđâz, mediačeäppõs, jieʹllikaart da musiikk. Âʹnne õõutsââʹjest mediasiiʹsǩid, koin lij ǩeeʹrjtum teʹkstt.
- tuʹtǩǩee miõlljurddlai da tuõđmeâldlai mediasiiʹsǩi räätk ouddmiârkkân täʹrǩstõõleeʹl päärnaiohjjlmid da päärnaid suåppi saaǥǥid.
- mättʼtâʹtte fiʹttjed media oummu puuʹtteem da vaʹlljeem siiʹsǩân.
- mättʼtâʹtte fiʹttjed mediasiiʹsǩid. Ǩiõttʼtâʹlle jeeʹresnallšem õlmmeemkuånstin mainnsi, siõri leʹbe päärnaiohjjlmi ǩiâvvmõõžžid da hääʹmid. Smeʹllkâʹstte päärnaid puuʹtteed jiijjâs tuʹlǩǩõõzzid.
Ââʹǩǩ-klassceâlaivuõtt 1-2
- tåbdd media fiʹttõõzz da silttad nõõmted måttmid kaart, liikkeei kaart da jiõn de täi õhtteelmid siiʹsǩeei mediasiiʹsǩid, mâʹt-a digitaalʼlaž siõr leʹbe video.
- harjjtââll lookkâd mediasiiʹsǩid, koin lij ǩeeʹrjtum teʹkstt. Mättʼtõõtti tobdstââtt ouddmiârkkân räiddkaartid.
- ââʹnned ââʹǩǩpâjja suåppi mediasiiʹsǩid, koin lij ǩeeʹrjtum teʹkstt.
- fiʹttai fakta da fiktio räätk da juâǥtââll mediasiiʹsǩid vuäʹpsteeʹl tuõđmeâldlaid da miõlljurddlaid de oudd tõin måkam-ne ouddmiârk. Mättʼtõõtti fiʹttai, što mediasiiʹsǩin lij raajji.
- fiʹttai, što mediasiiʹsǩin liâ jeeʹresnallšem ââʹnnemõõlǥtõõzz, mâʹt-a teâđ vääʹlteei leʹbe maaššâm miârkktõs. Mättʼtõõtti silttad uʹvdded siiʹsǩin måkam-ne ouddmiârk.
- silttad juâǥǥtõõllâd mediasiiʹsǩid tuõđmeâldlaid da miõlljurddlaid.
- toobdâst ââʹnnemõõlǥtõõzzin jeeʹresnallšem mediasiiʹsǩid da oudd måttmid ouddmiârkid.
- harjjtââll fiʹttjed da tuʹlǩǩeed kaart da jiõnnpirrõõzz. Mättʼtõõtti tuejjad huõmstõõzz vuâmmšõõzzin da ǩiččlâsttmõõžžin.
- silttad kovveed mediasiiʹsǩe ǩiâvvmõõžžid da hääʹmaid leʹbe tõʹst čuäʹjtum aaʹššin jiijjâs õlmmeem kuånstin.
- tuejjad mediasiiʹsǩin še jiijjâs tuʹmmjõõzzid da tuʹlǩǩõõzzid.
Ââʹǩǩ-klassceälaivuõtt 3-6
- veeidad ǩiččlâsttmõõžžâs jeeʹresnallšem mediasiiʹsǩin. Mättʼtõõtti tåbdd mediasiiʹsǩid kollʼjeei vuâđđfiʹttõõzz.
- teâtt, mii lij sosiaalʼlaž media, da fiʹttai tõn tåimmʼmâmvuâđđjuurdid.
- täʹrǩstââll vuäʹpsteeʹl ääiʹjpoddsain ââʹǩǩpâjja kuõskteei mediaeettmõõžžid da saǥstââll vuâmmsõõzzin.
- silttad nõõmted måttmid mediasiiʹsǩid, kook eʹtǩǩee fiktio ,fakta da vuäinâlm, da ââʹnned juâǥǥtõõllmõõžž veäʹǩǩen siiʹsǩi fiʹttjummšest da tuʹlǩǩummšest.
- teâtt, što mediasiiʹsǩin liâ jeeʹresnallšem õõlǥtõõzz, mâʹt-a maaššteei, vaikkteei, kaauplaž da teâđ vääʹlteei miârkktõs. Mättʼtõõtti silttad uʹvdded täin måttmid ouddmiârkid.
- tobdstââtt jeeʹres teʹksttšlaajid da tuʹtǩǩad mainsteeʹjid, kovveeʹjid, ohjjeeʹjid da peäʹlest vaʹlddi mediasiiʹsǩid. Mättʼtõõtti silttad uʹvdded mõõn-ne ouddmiârk.
- harjjan kaarti da jiõnnmaaiʹlm taʹrǩstõõllmõõžžâst. Mättʼtõõtti silttad ouddmiârkkân tuʹtǩǩeed karttkuuʹlmid da räʹtkkjeeivuõđid leʹbe smiõttâd musiikk ââʹnnemõõlǥtõõzz čuäʹjtemõhttvuõđstes.
- harjjan mediasiiʹsǩi fiʹttjummšest da tuʹlǩǩõõzzâst. Mättʼtõõtti silttad mainsted mediasiiʹsǩest čuäʹjtum aaʹššin da vueiʹnnemkuuʹlmin leʹbe kovveed juõnn da hääʹmai jeeʹresnallšem roolid.
- smeâtt, ǩii mediasiiʹsǩe ääʹššlažäʹrttel lij da mii lij siiʹsǩe miârkktõs.
- harjjan mediasiiʹsǩi taʹrǩstõõllmõõžžâst da tuʹlǩǩõõzzâst: tuʹtǩǩad mediasiiʹsǩin ouddmiârkkân mainsteei, genre leʹbe smeâtt teeʹmm.
Ââʹǩǩ-klassceälaivuõtt
- veeidad mediasiiʹsǩi tobdmõõžžâs tobdstõõđeeʹl jiõccses ođđ siiʹskid ouddmiârkkân bloʹǩǩe, podkâʹstte leʹbe elektroonlõʹžže liikkumša. Mättʼtõõtti kovvad ǩiččlâsttmõõšseez siiʹsǩi paarâst.
- teâtt, mii lij sosiaalʼlaž media, silttad nõõmted tõn kääzzkõõzzid de kovveed tõn tåimmʼmâmvuâđđjuurdid da siiʹsǩi luând.
- tåbdd da silttad ââʹnned jeeʹresnallšem mediasiiʹsǩid, mâʹt-a jieʹllikaʹrtte, journalisttlaid da sosiaalʼla media siiʹskid, kollʼjeei vuâđđfiʹttõõzz.
- tåbdd jeeʹresnallšem mainsteeʹjid, kovveeʹjid, peäʹlest vaʹlddi da ohjjeeʹjid mediasiiʹsǩid. Mättʼtõõtti silttad kovveed måttmid tõid oddvuõđi raajõõzzid da õlmmeem luândid, mâʹt-a ođđâs raajõõzz leʹbe vueiʹnelm argumentâʹsttem nääʹl.
- suåvtââll teʹksttšlaaji tobdmõõžž mediasiiʹsǩi taʹrǩstõõllmõõžžâst. Mättʼtõõtti harjjan ouddmiârkkân räʹtǩǩed sosiaalʼla media õõʹnnʼji čõõđtõõzzid ođđsin da toobdâst vuäʹpsteeʹl oddvuõđid õhtteeʹjid hybriditeeʹkstid .
- čiŋlmâtt vuäʹpsteeʹl kaarti da audiovisuaallai siiʹsǩi tuʹlǩǩõõzz tääidaid tuʹtǩǩeeʹl ouddmiârkkân jieʹllikaarti ǩiâvvmõõžžid, musiikk âânnmõõžž mainnâz jååʹđtummšest leʹbe teeknla čõõđtummuž.
- raʹvvai siiʹsǩe analyyttla täʹrǩstõõllmõõžž da tuʹlǩǩõõzz tääidaid. Mättʼtõõtti toobdâst mediasiiʹsǩin jeeʹresnallšem mainsteeʹji jiõnid da mainstemraajõõzzid, meäʹrtââll genre leʹbe smeâtt teeʹmm.
- silttad meäʹrtõõllâd, muʹvddem ääʹššlažäʹrttel mediasiiʹsǩaž kuõzztââll da mii lij siiʹsǩe raajji miârkktõs. Mättʼtõõtti väʹldd lokku čõõđtemõhttvuõđ.
- čiŋlmâtt mediasiiʹsǩi analyyttla täʹrǩstõõllmõõžž da tuʹlǩǩeem tääideez.
Media vaikktõõzzi fiʹttjummuš
Ouddpeâmm
- täʹrǩstâʹlle õõutsââʹjest päärnaivuiʹm, mäʹhtt media kuâsttai da vaiggâd päärnai aarǥâst, mâʹt-a siõrin da jieʹllempirrõõzzâst.
- ǩiõttʼtâʹlle media hääʹmai jiõččvuõđid da tåimmâmnaaʹlid arvvlâʹstted siõri pääiʹǩ.
- tuʹtǩǩee õõutsââʹjest ǩeittsid da mainste haaʹleem, taarbšem da vuästtmõõžž räätkain.
Vuõssmättʼtõs
- smeâʹtte media vaikktõõzzid jorddmõʹšše da tåimmʼmmõʹšše, mâʹt-a tiõttu da siõrrmõõžžid.
- mättʼtâʹtte fiʹttjed, što media vuäitt raajjâd aaʹššin miõllkaartid da täujjnõõvvâd. Täʹrǩstâʹlle vueʹjjid čuäʹjted maainâs- da zeevaihääʹmaid leʹbe sooǥǥbieʹlid päärnaiohjjlmin da jieʹllikaartin.
- täʹrǩstâʹlle âʹlddpirrõõzz ǩeittsid da smeâʹtte ǩeittsi õhttvuõđ âânnmõʹšše.
Ââʹǩǩ-klassceâlaivuõtt 1-2
- puätt teâđlõʹžžen media vaikktõõzzin oummu jorddmõʹšše da tåimmʼmmõʹšše, mâʹt-a fiʹttõõzzid aaʹššin da perstempaaiʹǩin. Mättʼtõõtti silttad uʹvdded måkam-ne ouddmiârk jiijjâs jieʹllmest.
- vuâmmaš vuäʹpsteeʹl media raajjâm täujjnõõvvâm aaʹššin. Mättʼtõõtti täʹrǩstââll ouddmiârkkân jieʹllikaarti leʹbe siõri hääʹmaid.
- fiʹttai, što media vuäitt täävvad miõlljuurdid da fiʹttõõzzid, da silttad uʹvdded mõõnn-ne ouddmiârk.
- teâtt, što media âʹnne vaikktummša da silttad nõõmted mõõn-ne vaikkteei mediasiiʹsǩe, mâʹt-a ǩeittsid.
- toobdâst mõõnn-ne mediasiiʹsǩin õčndõõvvâm vaikktem kuånst, mâʹt-a keâittčõõđtummšin õnnum nuʹbbâsttmõš leʹbe visuaalla viõggtõõzz.
Ââʹǩǩ-klassceälaivuõtt 3-6
- silttad uʹvdded måttmid ouddmiârkid mediasiiʹsǩi vaikktõõzzin jiijjâs tåimmʼmmõõžžâs, teâđeez, vueiʹlmid da miõlljuurdid. Mättʼtõõtti täʹrǩstââll vaikktõõzzid kriittlânji.
- täʹrǩstââll vuäʹpsteeʹl, muʹvddem miõlljuurdid mediasiiʹsǩe, ouddmiârkkân ǩeittaz leʹbe media kaart vääʹlte, da muʹvddem kuånstin vaikktelm räʹjje. Mättʼtõõtti silttad uʹvdded ouddmiârk.
- täʹrǩstââll, muʹvddem aaʹššid mediasiiʹsǩin âʹnne pueʹrren da kuõzztõõllʼjen.
- tåbdd da silttad nõõmted måttmid juurdid õlmmeei, peäʹlest väʹlddmõõžžid da vaikkted põrǧǧi mediasiiʹsǩid, mâʹt-a vuäinâlmǩeeʹrjtõs, ärvstõõllmõš, vlogi leʹbe meemi.
- toobdâst da kovvad måttmid mediasiiʹsǩi peäʹlest väʹlddmõõžžid da vaikkted põrǧǧi oddvuõđid, mâʹt-a ǩeittsi nuʹbbâsttmõš leʹbe huumor âânnmõš.
- tobdstââtt algoritmi tåimmʼmmõʹšše mediasiiʹsǩi vaʹlljõõttmõõžžâst.
- teâtt mediatåimmsueʹrj tuâjaid õhttsažkååʹddest. Mättʼtõõtti vuâmmaš media tåimmʼmõõžž ouddmiârkkân ǩiiččeeʹl ođđsid.
- täʹrǩstââll, muʹvddem ääʹšš vuäǯǯa media kueʹsttemvuõđ, da oudd ouddmiârkid.
Ââʹǩǩ-klassceälaivuõtt
- silttad smiõttad jeeʹresnallšem mediasiiʹsǩi da ääiʹjpoddsai mediakulttuur eettmõõžži vaikktõõzzid oummi da äʹrttli jorddmõʹšše da tåimmʼmmõʹšše. Mättʼtõõtti silttad uʹvdded mõõn-ne ouddmiârk.
- fiʹttai, što media vaiggâd õhttsažkååʹddest kulttuuʹre da aarvid vääʹlteeʹl miõlljuurdid, stereotypiaid da roolmaalid. Mättʼtõõtti silttad uʹvdded måkam-ne ouddmiârk.
- teâđast sosiaalʼla media luând vaikktem vuõllsen da teâtt tõn vaikktem kuånstid.
- tuʹtǩǩad mõnn-ne eettmõõžž leʹbe ääʹššlažäʹrttel čuäjtõõzz vaʹlljeemes mediasiiʹsǩin da tuejjad vuâđđuum tuʹlǩǩõõzzid vuâmmšõõzzin.
- fiʹttai jeeʹres mediai teäʹnʹjemlogiikk da tõn vaikktõõzz siiʹsǩõʹžže. Mättʼtõõtti toobdâst kaaupla da õlmmâz mediatåimmsueʹrj da sosiaalʼla media räätk tän vueiʹnnemkuuʹlmest.
- teâtt, mâiʹd miârkkšâʹvve sponsorâsttmõš da puuʹtʼtõs-šiõttõõllmõš mediasiiʹsǩin, da toobdâst kaaupla õhttsažtuâj peäggtummšid neʹttsiiʹsǩin.
- fiʹttai algoritmi vaikktõõzzid digitaalʼlai mediasiiʹskin, mâʹt-a ǩeittsi, sosiaalʼla media čõõđtõõzzi, ođđsi da vuõiggnuʹbbâʹsttem -kääzzkõõzz siiʹsǩi, vaʹlljõõttmõõžžâst.
- vuâmmaš da arvvtââll mediai tåimmʼmõõžž õhttsažkååʹddest ǩiiččeeʹl ääiʹjpoddsaid eettmõõžžid da tõi ǩiõttʼtõõllmõõžž mediain. Mättʼtõõtti čuäʹjat tõid kollʼjeeʹjid vuâđđuum vuâmmšõõzzid.
- täʹrǩstââll vuäʹpsteeʹl mediasiiʹsǩid ooumažvuõiggâdvuõđi, mâʹt-a vueiʹnelm- da sääʹnnväʹlddvuõđ vueiʹnnemkuuʹlmest da arvvlâstt ouddmiârk vieʹǩǩin tõi teâuddjummuž. Mättʼtõõtti arvvlâstt media etiikk vaʹlljuum ouddmiârk pääiʹǩ.
- seuʹrrai ääiʹjpoddsaid meeraikõskksaid saaǥǥid da eettmõõžžid de mediai tåimmʼmõõžž tõin.
- lij tobdstõõttâm journaliist vuäʹppõõzzid da silttad mainsted, mõõzz tõk liâ rajjum.
Media teâttkäivvan
Ouddpeâmm
- mättʼtâʹtte ââʹnned media teâđ haʹŋǩǩõõzzâst da analysâsttmõõžžâst. Tuʹtǩǩee õõutsââʹjest pirrõõzz da maaiʹlm ouddmiârkkân sniimeeʹl leʹbe oocceeʹl mediasiiʹsǩin teâđ päärnai perstem kõõččmõõžžin.
- smeʹllkâʹstte päärnaid šiõttlõõvvâd teâđstõõleen mediasiiʹsǩid. Mättʼtâʹtte seämma ääiʹj kriittlažvuõđ: ohjjee päärnaid kõõččâd sij vueiʹnnem da kuullâm aaʹššin.
Vuõssmättʼtõs
- âʹnne media määŋgpeällsânji veäʹǩǩen teâđ haʹŋǩǩõõzzâst da jeärggummšest aarǥ vueʹjjin.
- smeâʹtte da arvvlâʹstte, lij-a media vieʹǩǩin kaunnum teâtt ââʹnnteei.
Ââʹǩǩ-klassceâlaivuõtt 1-2
- silttad vuäʹpsteeʹl ooccâd teâđ måttmin digitaalʼlain mediasiiʹsǩin ââʹneeʹl ooccâmkääuʹn da ooccâmsaaʹnid.
- silttad ââʹnned media neävvan pirrõõz da aaʹššid tuʹtǩǩeʹmmen
- silttad ooccâd jiõččines da õõutsââʹjest järrsivuiʹm teâđ digitaalʼlain mediasiiʹsǩin.
- fiʹttai teâttvuâđđlai da miõlljurddlai mediasiiʹsǩi jeeʹresnallšem luând teâttkäivvan. Mättʼtõõtti fiʹttai, što puk mediast kaunnum teâtt ij leäkku ââʹnnteei leʹbe ååsklaž.
- tobdstââtt teâđ vääʹlteei mediasiiʹsǩid, mâʹt-a ođđâz.
Ââʹǩǩ-klassceälaivuõtt 3-6
- silttad ooccâd teâđ jeeʹresnallšem digitaalʼlain mediasiiʹsǩin, mâʹt-a neʹttseeid, digitaalʼla liist leʹbe radio- da tv-ođđâz. Mättʼtõõtti silttad ââʹnned ooccâmsaaʹnid teâđ haʹŋǩǩummšest.
- silttad ââʹnned media neävvan ođđ aaʹšši mättʼtõõttmõõžžâst.
- harjjtââll lookkâd da tuʹlǩǩeed kartteeʹjid, taullõõǥǥid da diagraammid de äuʹǩǩeed silttõõzzâs mediasiiʹsǩid, mâʹt-a ođđsid, täʹrǩstõõllmen.
- tobdstââtt algoritmi tåimmʼmmõʹšše teâđooccmõõžžâst.
- arvvlâstt vuäʹpsteeʹl jeeʹresnallšem mediasiiʹsǩi ââʹnntemvuõđ da snäätnaivuõđ teâttkäivvan. Mättʼtõõtti verddad vuäʹpsteeʹl jeeʹres kääivai teâđ.
- harjjtââll käivvkriittlažvuõđ. Mättʼtõõtti tääʹrǩâst vuäʹpsteeʹl mõõnn-ne teʹkstt- leʹbe karttkääiv da ǩiddad vuâmmšõõzz tuejjeeja da čõõđtemõhttvuõʹtte. Mättʼtõõtti silttad čuäʹjted mõõnn-ne vuâđđääʹšš mediasiiʹsǩe snäätnaivuõđ peäʹlest leʹbe tõn vuâstta.
- teâtt räätk journalisttlai da sosiaalʼla media siiʹsǩi puuʹtʼtem nääʹlest da fiʹttai tõi räätk teâttkäivvan.
- silttad kovveed mõõn-ne ploottlõʹžže tiõttu kollʼjeei staanvuõttvueiʹnnem-kuuʹlm, mâʹt-a puästtnallšem teâđ vaikktõõzzid tiõrvâsvuõttjeällmõʹšše.
- fiʹttai, što vääʹltum teâtt vuäitt leeʹd risttreeidast da što aaʹššid vueiʹtte leeʹd määŋgnallšem vueiʹnnemkuuʹlm.
- tobdstââtt journalisttlaid siiʹskid, mâʹt-a listt-teeʹkstid da tv-ođđsid.
- teâtt ǩeâlstõõllmõʹšše da čorrujååʹđteei tiõttu kollʼjeeʹjid eettmõõžžid mediast, mâʹt-a dis- da misinformaatio, deepfake da ǩeeʹlesođđâz.
Ââʹǩǩ-klassceälaivuõtt
- silttad ooccâd teâđ jeeʹres mediakääivain da täʹrǩstõõllâd teâđhaʹŋǩǩeemnaaʹlid kriittlânji.
- fiʹttai algoritmi tåimmʼmõõžž teâđooccmõõžžâst da teâđ vääʹltummšest mediast da silttad uʹvdded tõõzz kollʼjeeʹjid ouddmiârkid.
- väʹldd lokku algoritmi vaikktõõzz kaunnmes teâđ arvvlâsttmõõžžâst.
- äärvast jeeʹresnallšem mediasiiʹsǩid teâttkäivvan da smeâtt vuâđđeen tõi ââʹnntemvuõđ da snäätnaivuõđ.
- silttad arvvlâʹstted mediasiiʹsǩe vääʹltem teâđ snäätnaivuõđ taʹrǩsteeʹl ouddmiârkkân raajji da čõõđtemõhttvuõđ, ââʹneeʹl jåårǥlõttum karttooccmõõzz de veʹrddeeʹl teâđ jeeʹres kääivaid da vuâđđteâđeez.
- fiʹttai, što vääʹlteei teâtt vuäitt leeʹd risttreeidast da što aaʹššid vueiʹtte leeʹd määŋgnallšem vueiʹnnemkuuʹlm. Mättʼtõõtti teâđast kriittla arvvtõõllmõõžž taarb.
- silttad kovveed måttmid ploottlõʹžže tiõttu kollʼjeeʹjid staanvuõttvueiʹnnemkuuʹlmid, mâʹt-a čorrujååʹđteei teâđ vaikktõõzzid tiõrvâsvuõttjeällmõʹšše leʹbe vueiʹnlmi polarisâsttmõʹšše õhttsažkååʹddest.
- äuʹǩǩad siiʹsǩe snäätnaivuõđ arvvlâsttmen fiʹttjõõzzâs jeeʹresnallšem teʹksttšlaajin da ǩiddad vuâmmšõõzz siiʹsǩe tyyllʼlaid oddvuõđid da õlmmeemnaaʹlid.
- lij teâđlaž vennõõvvmõõžžâst da oouʹdad kriittlažvuõđ še jiijjâs jorddmõʹšše.
- veeidad ǩiččlâsttmõõžžâs teâđ vääʹlteeʹjin mediasiiʹsǩin da tobdstââtt ouddmiârkkân dokumeeʹntid, artikkelid leʹbe sosiaalʼla media teâđ vääʹlteeʹjid siiʹskid.
- tåbdd journalisttlai siiʹsǩi tåimmtemproseeʹss vuâđđjuurdid da hääʹmmad sosiaalʼla media siiʹsǩi räʹtkkjeeʹjid puuʹtʼtem naaʹlid. Mättʼtõõtti fiʹttai siiʹsǩi jeeʹresnallšem luând teâttkäivvan da šiõttlââvv kriittlânji sosiaalʼlõʹžžen leäʹvvneei tiõttu.
Mon media õõʹnnʼjen
Ouddpeâmm
- saǥstâʹlle õõutsââʹjest päärnai media ââʹnnmõõžžâst piârrjin: mediasiiʹsǩin, tõi paarâst õnnum ääiʹjest da ǩiččlâsttmõõžžin.
- ǩiõttʼtâʹlle päärnai jiijjâs perstem paaiʹǩin mediast siõreen da čieʹppes õlmmeem kuånstin.
- ǩiõttʼtâʹlle päärnai jiijjâs perstem paaiʹǩin mediast siõreen da čieʹppes õlmmeem kuånstin.
Vuõssmättʼtõs
- täʹrǩstâʹlle päärnai jiijjâs media âânnmõõžž. Smeâʹtte jeeʹresnallšem media ââʹnnemnaaʹlin da tõʹst, mäʹhtt media âʹnne jeeʹresnalla jiõččines leʹbe õõutsââʹjest.
- täʹrǩstâʹlle arvvtõõllǩâni päärnaid miârkksallaid mediasiiʹsǩid da smeʹllkâʹstte mainsted tõin määŋgpeällsain õlmmeemkuånstin. Smeâʹtte, mõõzz tõk liâ miõllsa.
- fiʹttje, što jeeʹres oummu ǩiččlâʹdde da âʹnne media jeeʹresnalla. Smeʹllkâʹtte päärnaid saǥstõõllâd ǩiččlâsttmõšsteez media paarâst da veʹrddeed tõid järrsivuiʹm.
Ââʹǩǩ-klassceâlaivuõtt 1-2
- silttad mainsted jiijjâs perstem mediasiiʹsǩin da vueʹjjin, mäʹhtt vuäitt ââʹnned media jeeʹresnalla.
- siâzztââll miõllsaid mediasiiʹsǩid järrsid. Mättʼtõõtti mättʼtââtt seämma ääiʹj äärvsted järrsi oummi vaʹlljõõzzid.
- fiʹttai, što liâ jeeʹresnallšem medianjõõđ da nääʹl ââʹnned media.
Ââʹǩǩ-klassceälaivuõtt 3-6
- ǩiččlâdd määŋgpeällsânji jeeʹresnallšem mediasiiʹsǩid, nõõmat tõin jiijjâz perstem siiʹsǩid da kovvad mõõzz lij perstõõvvâm tõin.
- kovvad jiijjâs media ââʹnnemvueʹjjeezz da smeâtt media miârkktõõzz jiijjâs jieʹllmest ouddmiârkkân mediapeiʹvvǩeeʹrj vieʹǩǩin.
- fiʹttai, što jiijjâs medianjõõđ mottai da što tõõzz vaikkte määŋg vueʹssbieʹll, mâʹt-a taaurõõžž, media da puärraz. Mättʼtõõtti teâtt, što vuäitt jiijjâs vaʹlljõõzzin vaiggted jiijjâs media ââʹnnmõʹšše
- silttad mainsted määŋgpeällsain kuånstin jiijjâs perstem mediasiiʹsǩin da raajjâd ouddmiârkkân videoviiŋg leʹbe bloggõõzz.
- silttad saǥstõõllâd äärvsteen järrsi jeeʹresnallšem media ââʹnnemvueʹjjin da miõlstõõvvmõõžžin.
- ravsmââvv jiijjâs vaʹlljõõzzin da järrsi vaʹlljõõzzi äärvstummšest media paarâst.
Ââʹǩǩ-klassceälaivuõtt
- silttad kovveed da vuâđđeed jiijjâs media ââʹnnemvueʹjjeezz da roolâs media õõʹnnʼjen.
- teâđast, mäʹhtt haaʹlad ââʹnned media da oouʹdeed ââʹnnemvueʹjjeezz.
- fiʹttai määŋgpeällsa media ââʹnnem miõđlaid miârkktõõzzid da tobdstââtt måttmid jiõccses ođđ mediasiiʹsǩid.
- jeärggad jiijjâs media âânnmõõžžâs pieʹǩǩen mediakulttuur da tõn eettmõõžžid.
- äärvast järrsi da jeeʹresnallšem media ââʹnnemnaaʹlid.